Оренбург татарлары Арчада

Оренбург өлкәсе татарлары 3 гыйнвар кичендә Арчага килделәр. Алар Көнбатыш кунакханәсенә урнашып, чәйләп алганнан соң, кичке Арча белән таныштылар. Казансу паркына төштеләр.
4 гыйнвар иртәсендә район башлыгы Илшат Нуриев белән очраштылар. Эшлекле сөйләшүләр алып бардылар. Үзара хезмәттәшлек итәргә сүз куештылар.
Аннан Арча буйлап сәяхәт иттеләр, «Казан арты» тарих-этнографик музейны, «Арча» спорт комплексын карадылар, Ташкичү мәктәбендә туган як музеенда, мәгърифәтче Шиһабетдин Мәрҗани музеенда, мәчеттә, Арчаның яңа 6нчы мәктәбендә, Боз сараенда булдылар. Яңа Кырлайда Габдулла Тукай музей комплексына сәяхәт кылдылар. Көтектә терлек асраучы Дамир Шакирҗанов, Мөндештә Хәлим Гарипов фермер-крестьян хуҗалыклары, Айванда яшелчә үстерүче Нафил Гатауллин эше белән таныштылар.
Кичен район мәдәният йортына үзләре алып килгән спектакльне куярга һәм карарга җыелдылар.